Chapitre 3
Sommaire
Win iwumi yekref ufus
( Mt 12. 9-14 ; Lq 6. 6-11 )
1 Sidna Ɛisa yuɣal ɣer lǧameɛ. Yella dinna yiwen wergaz iwumi yekref ufus.
2 Wid yellan dinna țɛassan deg-s ad walin m’ ad isseḥlu deg wass n westeɛfu,* iwakken ad ccetkin fell-as.
3 Sidna Ɛisa yenna i wergaz-nni iwumi yekref ufus : Ekker tbeddeḍ dagi di tlemmast.
4 Imiren yenna i wid yețmuqulen : D acu i d-teqqaṛ ccariɛa-nneɣ* ɣef wayen yeɛnan ass n westeɛfu ? A nexdem lxiṛ neɣ a nexdem cceṛ ? A nsellek taṛwiḥt n wemdan neɣ a t-neǧǧ ad immet ?
Lameɛna nutni ssusmen meṛṛa, ur zmiren ara a d-rren awal.
5 Sidna Ɛisa imuqel-iten s wurrif, yerna yeḥzen aṭas fell-asen imi qquṛen wulawen nsen. Yenna i wergaz-nni : Ḍleq-ed ( eẓẓel-ed ) afus-ik ! Iḍleq-it dɣa yeḥla ufus-is.
6 Imiren ifariziyen* ffɣen, ṛuḥen ad mcawaṛen nutni d ihiṛudiyen amek ara t-nɣen.
Sidna Ɛisa akk-d lɣaci
7 Sidna Ɛisa ijbed iman-is nețța d inelmaden-is* ɣer rrif n lebḥeṛ n tmurt n Jlili. Aṭas n lɣaci i t-id-itebɛen. Usan-d si mkul tama n tmurt n Jlili, si tmurt n Yahuda,
8 si temdint n Lquds, si tmurt n Idum, si tmurt akkin i wasif n Urdun, si leǧwahi n temdinin n Ṣur akk-d Sidun. Mi slan s wayen ixeddem, aṭas n lɣaci i d-yețțasen ɣuṛ-es.
9 Sidna Ɛisa iweṣṣa inelmaden-is a s-heggin taflukt, akken ur t-iḥeṛṛes ara lɣaci.
10 Ladɣa imi yețdawi aṭas n imuḍan, wid akk yuḍnen ẓeddmen fell-as iwakken a t-nnalen.
11 Iṛuḥaniyen m’ara t-walin, ɣellin zdat-es qqaṛen-as : « Kečč d Mmi-s n Ṛebbi !»
12 Meɛna nețța yețgalla deg-sen iwakken ur d-qqaṛen ara anwa-t.
Sidna Ɛisa yextaṛ tnac ṛṛusul
( Mt 10. 1-4 ; Lq 6. 12-16 ; )
13 Sidna Ɛisa yuli ɣer yiwet n tiɣilt, yessawel i wid yebɣa dɣa usan-d ɣuṛ-es.
14 Yextaṛ tnac deg-sen ad ilin d ṛṛusul ad țeddun daymen yid-es, iwakken a ten-iceggeɛ ad beccṛen lexbaṛ n lxiṛ,
15 a sen-yefk tazmert akken ad ssuffuɣen leǧnun.
16 A ten-ah tnac-nni yextaṛ : Semɛun iwumi isemma Buṭrus,
17 Yeɛqub akk-d gma-s Yuḥenna yellan d arraw n Zabadi iwumi isemma Buneṛǧes (yeɛni arraw n ṛṛɛud).
18 Andriyus, Filbas, Bartelmay, Matta, Tuma, Yeɛqub mmi-s n Ḥalfi, Taddi, Semɛun akenɛani ( awaṭani ) 19 akk-d Yudas n Qeṛyut, win akken ixedɛen Sidna Ɛisa.
Ddnub ur nețwasemmaḥ ara
( Mt 12. 22- 37 ; Lq 11. 14-23 )
20 Imiren, Sidna Ɛisa yuɣal ɣer wexxam. Nnejmaɛen-d daɣen ɣuṛ-es lɣaci ḥeṛsen-t nețța d inelmaden-is armi ur zmiren ara ad ččen.
21 Mi gewweḍ lexbaṛ ɣer imawlan is, ṛuḥen-d a t-awin axaṭer ɣilen yedderwec !
22 Imusnawen n ccariɛa i d-yusan si temdint n Lquds qqaṛen : D Balzabul iḥekkmen ɣef leǧnun i t-izedɣen , s tezmert-is i gessufuɣ leǧnun !
23 Sidna Ɛisa yessawel-asen, ihdeṛ asen s lemtul, yenna-yasen : Amek yezmer Cciṭan* ad issufeɣ Cciṭan ?
24 Ma yella țnaɣen imezdaɣ n tmurt wway gar-asen, tamurt-nni ur tețdum ara.
25 Ma yella yekker ccwal ger wat wexxam, axxam-nni ad yeɣli ur yețbeddad ara.
26 Ihi ma yella Cciṭan yețnaɣ d yiman-is tebḍa tgeldit-is, tazmert-is aț-țeɣli dɣa aț-țefnu.
27 Yiwen ur izmir ad ikcem ɣer wexxam n wergaz iǧehden iwakken a d-yaker ayla-s, m’ur t-yuriz ara uqbel ! M’ara t-yarez, imiren yezmer ad yaker axxam-is meṛṛa !
28 A wen-d-iniɣ tideț : a sen țwasemmḥen i yemdanen meṛṛa ddnubat-nsen d rregmat-nsen,
29 ma d win ireggmen Ṛṛuḥ iqedsen,* d lmuḥal ad yețțusemmeḥ ; ddnub-is ad yeqqim ɣef yir-is i dayem.
30 Yenna-d annect-agi axaṭer qqaṛen-as: Izdeɣ-it Cciṭan.
Yemma-s d watmaten n Sidna Ɛisa
31 Wwḍen-d watmaten n Sidna Ɛisa akk-d yemma-s. Qqimen di beṛṛa, ceggɛen ɣuṛ-es a d-yas.
32 Nețța yella zdaxel n wexxam yezzi-yas aṭas lɣaci ; nnan-as : A Sidi, yemma-k d wayetma-k akk-d yessetma-k, atnan di beṛṛa țnadin fell-ak.
33 Sidna Ɛisa yerra-yasen : Anta i d yemma, anwi i d aytma ?
34 Dɣa imuqel meṛṛa wid i s-d yezzin yenna : Ațah yemma, atnah wayetma.
35 Axaṭer win ixeddmen lebɣi n Sidi Ṛebbi, d win i d gma, i d weltma, i d yemma !